- 763 -

1452. Juni 1.

Vnsirn vrundlichin grus zuuor, liebin hirren vnd vrunde, zo ir denne wist, daz vns dy hirren, dy bey euch legin, vfte vnd vil etczlicher mosze angelangit habin muntlich vnd briuelich, doruff sye denne vnsir wedirrede vnd antwort wol vornomen habin, nw werden wir vndirricht vnd in geheyme vorwarnet, daz sie vnd nebin en andere meynen vns hoer zu vorgeweldigen vnd zw drangen, des wir dach nicht vordynet habin vnd weldin is auch vngerne vorschulden zundir alleczeit gerne tun vnd faren, alz gute lewte behorit, begeren wir von ouch mit fleisze an en zu dirfaren vnd zu fragin, wes wir vns in eyme sulchin zu en, euch vnd nebin en eren helffern vorsehen sullen, zo wir yo geschicket seyn andirs nicht zcu tun wenne rechte; wurde vns denne hirobir ymand weytere geweidigen vnd vornotigen, musten wir tun alz gute lewte vnd vns mit gotis hulffe vnd gutir lewte zulchir vnrechtir gewalt vnd gedrangis schotczen vnd weren, zo beste wir mochten, daz wir doch vngerne vornemen welden vnd betin des vorschrebener antwort vns dornoch zw haldin. Gegebin am donrstage noch Phingisten im LIIten jare.
Burgermeister, rathmanne der stad Goltberg.

Rückaufschrift: Den erbern weizen herren burgermeister ratmanne der stat Legnicz, vnsern liebin vnd guten frunden.

Orig. Kgl. Bibl. z. Berl. Ms. Boruss. f. 568. No. 107.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866